上海闲话 过去・现在・未来——绪论第0节 开题词与自我介绍

面向啥人

我晓得能够看到迭只视频的朋友，一定是对上海闲话，甚至是全国方言侪抱有一眼兴趣的，因此迭眼视频统统以方言来教课，如果讲需要提到其他方言区，甚至外语，搿么我也会得用当地闲话来讲课。假使讲侬来自北方官话区，听弗懂其他方言区内容，我也会在每一只视频里加上字幕，方便大家理解其中之内容。

迭个是个长期过程，在我长视频的空档期呢，我会得用短视频来填充空档。就像我先前所讲，现在大部分的知识侪通过平面且零碎个方式进入受众耳目之中，一眼零碎的用词语法现象，我也会得通过短视频的方式来跟诸君分享。

在选字上，不管是笔记还是字幕，我侪采取本字＞俗字＞拼音的方式，我相信看本字诸君呢看起来么应该无啥障碍，但类似『白相』等字，已经有相当接受程度个吴语词汇，可能一开始写成『彷徉』诸君不太习惯，但迭些对于我伲想要搞懂上海闲话的流变而言还是邪气必要的。

自我介绍

讲了加许多，我还没向诸君介绍过我自己：我呢叫淳于诺，是一名普普通通中文系毕业生，大学呢不在上海读个，除此之外呢就基本上就没出过上海哉。我呢不是蹲在市区，是徐汇闵行长宁交界处虹桥镇人个啦，因此呢平常兹讲的闲话呢不属于狭义上上海闲话个，是郊区方言松江闲话一支，虽然讲我拿上海闲话上迭门课么带兹一点口音逃弗开哉，有得讲了弗对个地方么也请诸君呢不吝指出哉，我呢定当虚心接受。

好，讲兹迭能多，接下来我伲就要开始进入正题哉。上海闲话，老底子里厢到底有的无的呢？迭个是个值得讨论的问题。想要晓得最早上海话是从啥辰光开始个，仅仅凭借几代人个记忆是不可取个。通常来讲，上海市区闲话开始明显区别于上海郊区忒兹老派上海闲话是从太平天国变乱开始的。

上海闲话个产生

太平天国的变乱，在大家的历史书里面往往只是讲到伊的天朝田亩制度跟均田制。像哉伊是一个老实个好农民，但实际上相去甚远。画面上是一张关于太平天国期间江南地区的人口流失图片，可以比较直接看出来迭场变乱拨整个吴语区所造成的破坏。当中个过程我伲暂且勿论，变乱的结果就是：大家侪拼兹性命逃，其中大部分侪进入了上海公共租界中，开始相互交流，产生具有共同语性质的上海闲话。