孤独之夜

孤独之夜

伊睏相不算老好，到了夜到睏觉的辰光，我总要忒伊叻梦里厢打相打，但每趟我侪输的落花流水，有辰光我输急了，从梦里惊醒，像是报复一样地往伊屁股浪或者是胸臂高头拧一记，伊也不睬我似的仍自顾自轻轻教打呼噜。刚刚也吃了败仗，我打伊不过，遽从地浪铺的两人凉席上逃难到床前头打字。

孤独不过如此啊！侬吃尽浑身力道，最后不过是一场只有自己参与自己看见的恶戏作，人家啥人也不晓得。

天浪向的月亮已经落了有段辰光了——弗如讲在夜到我就没看到月亮过。昼长夜短时分日月共生才是常态，搿么，太阳忒哉月亮啥人更加孤独呢？我感觉是太阳。

月亮大概已经习惯了借牢太阳荫头的日节，但太阳不是，伊有辰光能看到月亮跟伊一道上班，但是别转屁股伊就不看见了，有辰光太阳快落班了，月亮才刚刚慢吞吞爬起来上班。

刚到伊屋里的辰光，伊帮我讲，伊拉屋里吃饭要比伲的晚，我当作是早饭八九点钟迭种晚，没想到十一点钟我伲中饭都快烧好的时刻，伊拉刚刚开始吃早饭，所以我以为是“吃饱夜饭看电视，听我阿庆讲故事”的辰光，突然之间又端出一锅白米粥来讲前头是点心，现在才是夜饭迭一刻，不管几趟侪有眼异乡的落差。

夜饭的辰光，我想搛一筷子山芋叶子，结果连根拔起来了半盆子菜，我鲁莽的有眼尴尬，不响放下了筷子，又挑起一根菜根搛了一棵菜夹到碗里厢，伊看到了，不是来嗔笑我两句就是话我是“精贵的上海人”，但就是此刻，我拍扁伊的屁股也调不来一句“十三点”，香穿伊的面孔，也等不到伊拿我推开，还不忘打一记耳光了。

鼾声仍在继续，我自己提议要早睡早起，恢复我登叻上海的作息的，但此刻我已晓得早浪头我断然是爬不起来的，这样的孤独，我经历过一趟，伊也要陪我莫名其妙地经历一趟，为我调也调不过来的生物钟。